CARREIRA POPULAR DE MEAÑO: DOUS ADEUSES  

En sinal de loito, mantemos pechada unha folla deste Ventanuco en sinal de loito, na memoria de Mario Capa Riveiro. El era un dos atletas habituais na Carreira Popular de Meaño -e de tantas outras- mentras o corpo lle aguantou, ata que finou antonte venres 26 de agosto, no seu Marín de adopción. Descubrir a Carreira Popular de Meaño supuxera para el un reencontro emocional con seu Meaño natal. Porque Mario Capa nacera no lugar dos Agros no seo dunha familia tan humilde que, naqueles “tempos da fame” -que foran os anos 40 do pasado século- tiña moitas dificultades para botar alimento á barriga. O seu reencontro emocional tamén coa lembranza Sara García Souto (1909-1988), finada xa, a quen lembraba pola súa xenerosidade silandeira: “cada vez que pasaba por diante da casa -rememoraba Mario- siña Sara, levábame dentro para darme algo de comer”. Nos anos 90, co seu voltar a Meaño pola Carreira Popular, foi quen de pousar un ramo de frores na lápida da Sara en lembranza dela. (Arriba na foto, Mario Capa, dorsal 8105 na liña e saída na Popular de Meaño, inicios. s. XXI)
Un Mario Capa, que con seu coche matrícula de Gran Canaria, botaba unha man levando carteis da Carreira e, co súa brocha e bote de cola, íaos pegando camiño de Marín e contorna, ou mesmo o sábado, día anterior á Carreira, viña a Meaño a parolar e axudarno a poñer vallas coa organización.
 

Unha Carreira Popular, que tras o parón pola COVID, regresa este ano (ver datos no cartel da foto). Será o vindeiro 11 de setembro co súa 36º eidición e coincidindo coa festa dos Miragres. A novidade vai ser que a  organización será asumida exclusivamente polo concello, declinando a asociación GAM estar presente. Sobre os motivos, uns profundos, outros recentes, toca pasar páxina neste intre. Sempre cabe dar co intre axeitado para un adeus tan comedido como elegante.
A Popular de Meaño nacera  en 1985 e mantívose de man da asociación GAM durante 25 anos. Logo, entre 2010 e 2019, a xente deste colectivo mantívose ligada á Carreira colaborando na organización co concello. Durante a pandemia, ao non poder facerse, o GAM aviuse a manter viva a chama da Carreira con seu “Correr por Meaño” -iniciativa que ata fora criticada polo goberno local que atribuía ao feito un risco sanitario pola COVID. Pero pese a todo, contra vento e marea, e de xeito altruista, mantívose “Correr por Meaño”. 

Organización da Carreira, ano 2009, cando o 25 anos da proba
(arriba con chaqueta marrón o atleta e padriño desa edición Pedro Nimo, que daría o pistoletazo de saída.

A 36º edición da proba manterá os parámetros dos últimos anos: saída conxunta ás 11 da mañá para o total de categorías 19 categorías, das cales 17 son competitivas, mentres andantes e chupetes serán só participativas. No capítulo de premios, e por criterio da nova organización, a novidade é que desaparece o “premio á fidelidade”, incentivo que se mantiña desde 2014, e que galardoaba ciclos de cinco participacións consecutivas por corredor.

Si se repiten as demais pautas: 300 euros máis o seu peso en botellas Rías Baixas de Paco&Lola para o primeiro clasificados tan masculino como feminino; os segundos, 200 euros e unha fin de semana para dúas persoas en hotel Quinta de San Amaro; e os terceiros, 100 euros, máis unha cesta de produtos gastronómicos que achega Supermercado Lage. En canto a categorías, os tres primeiros clasificados de cada unha recibirán senllos trofeos deseñados pola ceramista Mar Barral, camiseta para todos os participantes que completen percorrido entrando en meta e, a maiores, senllos reloxos Viceroy se se baten os récords do circuíto absoluto. Iso si, 300 euros que se manteñen como premio económico ao primeiro clasificado... desde 1993! Nauqel anos o GAM, con aquelas 50.000 pesetas, rompía o teito para quedarse e convertir a Carreria de Meaño en referencias (mágoa que metidos xa da década dos 20, e con 30 anos de distancia sobre aquel 1993, o concello non vira a necesidade de actualizar esta cifra modificando os premios á alza).