Opinión***

O CUARTO PODER            

A información é o cuarto poder. Elixir medio para seguir a actualidade (por parte do lector, oínte ou telespectador ávido de información veraz), mellor que sexa unha decisión mudable. Do contrario, se te estancas, o medio devórate.
Cabe lembrar os grandes escándalos destapados polos medios máis ousados do momento, e que, por contra, outros quixeron tapar o poder executivo de quenda. Cando o affaire dos GAL a a fins do 80 (e co PSOE no poder), o consumidor que quería estar na cresta da onda desa información tiña que ler  “Diario 16”, cando outros medios, primeiro aliñeáronse coa versión do goberno e logo, conforme medraba e escándalo, pasaban de puntiñas sobre o asunto. Cando Filesa nos anos 90, o consumidor que pretendía información de vangarda, tiña que ler El Mundo. E cando os atentados do 11-M en 2004, naquela noite de reflexión, quen procuraba información real sobre a autoría do atentado, tiña que escoitar a cadea Ser, mentras outros desviaban o tiro en víspera da xornada electoral, manténdose fieis ao PP de Aznar (aínda que logo a noite comeunos). Ou cando a marea negra do Prestige, cabía fuxir da TVE sempre servil ao executivo (o PP daquela, ou o PSOE de agora). E cando o de Bárcenas e a contabilidade B do Partido Popular, tocaba ler El Mundo ou El País, que foron os máis avezados en destapalo.

No intre de hoxe, que medios ousados saltaron denunciando o affaire Ábalos-Koldo-Cerdán & cía? Pero agorra El Mundo xa non é El Mundo, El País non é El País, a cadea Ser non é aquela cadea Ser… Cabe emigrar, buscar outros medios: El Español? El Confidencial? OK Diario? Onda Cero? Antena 3? Cuatro?... A saber!
É aquí, cando toca elixir (quedar ou mudar?), se quere é consumir información libre e veraz, ou tragar co panexírico edulcorado de comunicados de partido. O mérito do consumidor estará en discernir cal é cal. Certo que para as personas á fronte de información, ben o saben, ser libre e independente é moi duro, e ten un custo a pagar. Pero a honradez non se vende nunca. Neste Meaño, e desde este portal, tampouco.