A COVA DO TRASNO: HISTORIA VIVA

Cando os días se fan curtos e a noite cae pronto, cando o frío e a choiva calan os ósos, é o intre axeitado para abrir esta “Cova do Trasno” e refuxiarse nela ao calor dunha boa conversa e algo de música  ben adobado cun cafeciño quente. Así o concibe a Asociación Cultural e Deportiva GAM, que reabre neste mes de santos o seu foro de debate e coloquio: será o vindeiro venres, 28 de novembro , ás 20,45 horas no Pazo de Lis, coa primeira entrega do curso.

Baixo o título “Historia viva: Memoria da primeira corporación democrática meañesa (1979-839)" intervirán tres concelleiros vivos daquela corporación, presidida entonces por Germán Rodiño (primeiro alcalde democrático en plena transición). Os tres para conversar serán Manuel Padín Pérez, Laureano García Ruibal e Manuel Crespo Domínguez. Para a ocasión un coloquio de 50 minutos con música de acordeón en directo de mans de Pablo Dovalo, que tamén fixo naqueles anos os seus piniños na política municipal.

Como resultou aquela primeira experiencia de organización democrática cando ninguén deles viviran antes tan cousa? Como se fraguaron aquelas primeiras listas? Como eran aqueles novedosos plenos en democracia? Quen represetanba o que? Que anécdotas daqueles anos merecen ser contadas? Todo isto e máis nun foro sen medias tintas, onde coa Asociación GAM  nos temos mollado co radón, cos fitosanitarios do viñedo, coa represión franquista, co esquecemento dos nosos, cos alcaldables nas eleccións de 2023… Pero tamén, coa poesía, coa literatura infantil, co voluntariado meañés nas ONGs, co modelo educativo… Porque, ante todo, somos un espazo de libertade, un espazo plural, que fai saír sarpulido aos do pensamento único, plano, onde a ignorancia é obxectivo para domiñar á plebe. Uns encontros que sempre nos fai mellores persoas ao acabar. Sen máis pretensións que vivir e te sintas ben. Refúxiate por un intre nesta cova, ao calor dos veciños inquedos de pro.