*** Opinión

Atomizadores

Como cada ano por estas datas na comarca de O Salnés, área vitininícola por excelencia, asistimos ao tratamento masivo de viñedos con tratamentos fitosanitarios facendo uso en moitos casos de atomizadores conectados a cabezas tractoras. Cantidades inxentes de produtos químicos, tóxicos e canceríxenos, son vomitados de xeito indiscriminado á atmosfera, moitas veces a carón mesmo de vivendas, centros escolares, zonas de horta e eiras de cultivo, deixando contaminados, amén dos habitáculos, verduras, hortalizas e froitas que son consumidas logo -ás veces no mesmo día- sen respectar os prazos de seguridade establecidos. A irresponsabilidade de moitos aplicadores empregando atomizadores en días de vento agrava aínda máis esta situación. Non só estamos a respirar os venenos químicos dos productos fitosanitarios, algo peor, estámolos a comer cada día na mesa sen sabelo, servidos directamente desde a nosa horta que criamos “ecolóxica”.

Urxe a actuación das autoridades sanitarias para deter este envenamento sistemático e a adopción dunha normativa explícita que regule o emprego de atomizadores, impedindo o seu uso preto de vivendas, colexios, parques infantís, hortas, ríos… a fin de minimizar o seu impacto sobre a poboación, tal e como xa ocorre desde fai anos noutros estados europeos. Desde a Consellería de Medio Ambiente da Xunta de Galicia só son quen de informar que existe un “código de boas prácticas” que o aplicador debe coñecer e por en práctica, pero recoñecen carecer dunha ordeanza que sancione o seu incumprimento. Para entendernos, é como se establecemos un límite de velocidade nunha travesía pero sabemos de antemán que a garda civil non nos vai sancionar por non respectalo. Urxe pois un regulamento nítido que contemple sancións rotundas e a actuación decidida do Seprona e demáis forzas de seguridade para velar polo seu cumprimento. Todo en pro de minimizar este envenamento que vai dexenerar -si non o está facendo xa- no aumento do cancro na nosa comarca. Imponse xa un estudo que empece a avaliar o impacto, ou non?.

Nota: Se queres deixar un comentario ou opinión pública sobre calqueira entrada deste blogue pincha na parte inferior da entrada onde se refire "comenatrios", pero se non te aclaras como facelo podes dirixilo directamente á seguinte dirección de correo electrónico fuenblanca@yahoo.es